Motorsiklo natagak, 1 patay

CEBU, Philippines - Usa ang patay ug laing usa kritikal ang kahimtang human aksidenteng natagak sa lawom nga pangpang ang motorsiklo nilang gisakyan sa Poblacion lungsod sa Borbon niadtong Miyerkules sa alas 9:00 sa gabii.

Ang mga biktima mao ang drayber sa Honda XRM nga motorsiklo nga si Rolly Soliano Melgo, 24, ug ang angkas niining si Diony Taylaran Tugnon, 30, pulos mga molupyo sa barangay Cadaruhan sakop sa maong lungsod.

Matud pa ni PO3 Edgar Novabos sa Borbon Police dihang nahinabi sa Banat News gikan nagduwa og billiards ang mga biktima samtang nag-inom sa lungsod ug nianang pagkagabii na nakahukom kining mamauli.

Gituohang ang ilang kahubog maoy nakaingon sa pagkawala og kontrol ang drayber nga si Melgo hinungdan nga natagak sa pangpang nga dunay gibana banang 8 ngadto sa 10 ka tiil ang gilawmon. - BANAT NEWS