CEBU, Philippines - Gibana-banang mokabat sa P200 mil ang katibuk-ang danyos sa nasunog nga duha ka andanang panimalay didto sa barangay Central Poblacion, lungsod sa Naga niadtong Martes sa alas 2:10 sa kahaponon. Ang balay nga nasunog gipanag-iya ni Henrita Canonigo, hingkod, minyo ug molupyo sa maong lugar.
Sumala sa kapolisan nga milanat og 5 minutos ang pagpakigkombati sa mga sakop sa kabomberohan sa Naga sa kayo ug gumikan sa ilang panlimbasog wala kini makatapon sa laing mga balay. Miabag usab ang kabomberohan sa lungsod sa Minglanilla ug siyudad sa Talisay hinungdan nga dali rang napawong ang kayo.
Si PO2 Ken Cabrera sa Naga Police mibutyag sa Banat News nga faulty electrical wiring ang hinungdan sa maong sunog nga naggikan sa usa sa mga lawak sa maong panimalay.
Wala hinooy gikatahong na-angol o nakalas atol sa maong hitabo, apan ang nakadako dayon sa kayo mao ang kagaan sa mga materyales ug dapat sa maong balay. - Darrel A. Carumba (BANAT NEWS)