Naghikog nasalbar sa mama

CEBU, Philippines - Napakgang ang tinguha untang paghikog sa usa ka menor de edad nga lalaki dihang nadiskobrehan kini sa iyang inahan sa sulod sa ilang balay sa barangay Gun-ob, dakbayan sa Lapulapu alas 11 pasado ang takna sa miaging gabii, unya nadala dayon sa tambalanan.

Si PO3 Candido Baringue nga nahinabi sa Banat News miingon nga base sa giasoy sa inahan nga iyang gikasab-an ang 16 anyos niyang anak (ngalan gipugngan) sayo sa miaging hapon tungod sa paglakaw nga walay pananghid ug dugay kining nahiuli.

 Matud pa ni PO3 Baringue nga nagtuo ang inahan nga gibati lamang og kahiubos ang iyang anak sa iyang pagkasaba niini hinungdan nga buot kining magpakamatay pinaagi sa paghigot og pisi sa liog niini.

Dugang pa ni PO3 Baringue nga misulod sa lawak sa ilang balay ang maong menor de edad ug nanirado apan namatikdan sa inahan ang kinagolkol ug agulo niini. Dihang gisusi sa inahan maoy napalgan nga nagbitay na ang iyang anak sa gihikot nga pisi sa liog niini kansang tumoy didto igaid sa sagbayan sa ilang balay. - BANAT NEWS