3 mag-mayor gihangop ni Tomas

CEBU, Philippines - Gihangop ni   Mayor Tomas Osmeña ang mitumaw nga report nga tulo ka mga kandidato ang magpapili pagkamayor sa siyudad sa 2010 elections.

Ang leader sa oposisyon sa dakbayan nga si Jonathan Guardo maoy nakapanglantaw sa three-cornered fight sa umaabot nga piniliay sa dakbayan.

Kini tungod kay gikonsiderar ni Guardo ang igsuon sa mayor nga si Georgia Osmeña nga seryuso sa tinguha niini pagpapili sa nahisgutang posisyon.

Gani miingon si Guardo nga gikan sa TRO (Tomas dela Rama Osmeña) posibleng GRO (Georgia dela Rama Osmeña) na ang modumala sa siyudad sunod tuig.

Gikonsiderar sa leader sa oposisyon si Georgia nga dili kakompiyansahan tungod kay kini giingong hinay-hinay nga nimugna og kaugalingong grupo.

Apan matud ni Mayor Osmeña nga gawasnon ang nasod nga Pilipinhon ug mahimong makapapili sa eleksyon kadtong kwalipikadong mga molupyo.

“It’s a free country, three cornered, four cornered, five cornered, whatever!.. one cornered way lami, way thrilling,” sumala ni Osmeña.

Giangkon sa Mayor nga dunay politikanhong kasungian ang ilang pamilya hinungdan nga kini dili na mahibulong nga atbangan ni Georgia ang Bando Osmeña Pundok Kauswagan (BOPK).

Ang BOPK nga gipanguluhan sa mayor miduso na kang Bise Mayor Michael Rama ug Education Consultant Joy Augustus Young pagka-mayor og bise mayor sa 2010 elections.

Makapila na sublia ni Osmeña ang pag-endorso nilang Rama ug Young bisan pa man kung dunay kaalyado nilang mga barangay kapitan nga wala makauyon niini.

Gawas kang Rama ug Georgia, padayon karong gipangulitawhan sa oposisyon si Kongresista Antonio Cuenco nga himuon nilang standard bearer sa umaabot nga piniliay.

Masaligon hinuon si Guardo nga dili pakyason sa kongresista ang ilang awhag nga kini magpapili pagkamayor sa 2010 elections ubos sa oposisyon. - Elly Bolonos (BANAT NEWS)