Bayongbayong nalumos sa sapa sa Malubog

CEBU, Philippines - Usa ka bayongbayong namatay kay nalumos sa gikaligoan niining sapa didto sa sitio Laong, barangay Malubog, dakbayan sa Sugbo kagahapon sa alas 9 pasado sa buntag.

Si PO3 Lou Pagara sa homicide section sa Cebu City Police Office miila sa biktima nga si Johnrel Bangga-Bangga, 15, nga taga lower Malubog.

Nasayran gikan sa kapolisan nga sa sayo pa ang biktima gisugo sa iyang ginikanan sa pagpangahoy og sugnod sa ilang palibot kauban sa iyang upat ka mga higalang silingan nga sila si Phil John, Dave, John Paul ug Mark.

Apan imbis mangahoy giingong mideretso sa sapa ang biktima ug ang mga kauban niini aron maligo.

Apan matud pa sa kapolisan nga gihinabi sa Banat News nga dihang diha na sa sapa ang biktima nga naglangoy-langoy uban sa mga kauban niini, kalit lang kining migahi ug wala na maglihok sa tunga-tunga sa sapa.

Gisakwat kini sa mga kauban apan gumikan sa kabug-at wala dayon madala sa daplin ug nangayo sila og panabang sa mga tawo duol sa maong sapa.

Usa ka ginganlan og Danilo maoy misakwat sa biktima ngadto sa daplin ug sa pagkawas niini nangalagom na ang tibuok kalawasan sa biktima.

Gihatod dayon sa Emergency Rescue Unit Foundation (ERUF) ang biktima ngadto sa Cebu City Mecical Center (CCMC) ug didto kini ideklarar nga patay na.

Si Carlos Bonghanoy, 64, nga silingan sa biktima mibutyag sa Banat News nga ang sapa nga gikaligoan sa biktima ug mga kauban may giladmong 20 metros gumikan kay usa kini ka dam.

Hinuon matud pa ni PO3 Pagara nga kun mosugot ang mga ginikanan, ila kining ipa-autopsy aron masayran gyud ang tinuod nga hinungdan sa kamatayoin niini. – BANAT NEWS