Gisaka sa balay gitusak og bala

CEBU, Philippines - Natusak-tusak sa mga bala ang tibuok lawas sa usa ka mangayuhay og relo human kini gipusil sa wala mailhing tawong nagtaptap sa nawong samtang nagtan-aw’g telebisyon niadtong Sabado sa gabii diha sa ilang panimalay sa sitio Taytayan barangay Agujo lungsod sa Daanbantayan.

Si SPO3 Cesar Carlos Alburo, imbestigador sa Daanbantayan Police Station nga gikahinabi sa Banat News miila sa biktima nga si Samuel Duat, 42, nagpuyo sa nahisgutang lugar.

Samtang ang suspetsado nga wala mailhi gihulagway lang sa kapulisan nga may pamarog nga 5’ 7, dako’g lawas, naka-short pants, ingon man nagtabon sa iyang nawong og t-shirt atol sa pagpamusil.

Matud pa niini nga ang biktimang si Duat, nagtan-aw kini’g salida sa telebisyon gawas sa iyang panimalay dihang kalit lang nibutho ang suspetsado diha sa iyang luyo sa kural nga kawayan sa ilang panimalay daplin sa dalan ug gipusil makadaghang higayon.

Sumala pa ni SPO3 Alburo nga si Duat namatay diha-diha gilayon human maka-angkon og 17 ka mga samad pinusilan sa nagkadaiyang bahin sa lawas nga naglapos-lapos gikan sa kalibre .45.

Human sa pagpamusil sumala pa sa mga residente ang nag-maskarang tawo yano rang naglakaw nga misibat palayo sa lugar.

Ang mga kabanay sa biktima midali unta sa pagdala niini sa tambalanan apan gumikan sa mga samad nga naangkon niini gideklarar kini sa mga doktor nga dead-on-arrival.

Nakuha sa kapulisan sa crime scene ang walo ka mga kabhang sa kalibre .45 ingon man duha ka mga slug niini.

Gisubay nila karon ang imbestigasyon nga posibleng ang gikabangi niining tawo   sa ilang lugar maoy responsable sa pagpatay sa biktima kini human duna kini gipasakaan og kasong frustrated murder tungod sa pagtigbas kaniya niadtong 2007.

Samtang niadtong 2001 usab nabilanggo usab kini sa Daanbantayan human usab gipasanginlan nga nangulata diha sa ilang lugar hinuon na settled na ang maong kaso.

Dugang nakuhang impormasyon sa kapulisan sa dapit nga upat ka adlaw sa wala pa patya ang biktima dunay nakit-an ang mga residente nga mga tawo nga magsakay og motorsiklo kolor puwa nga magpunay'g balik-balik sa lugar.

“Gi-pattern na ni siyang daan sa suspetsado posible personal grudge o kaha mga gun-for-hire ang mipatay niini gumikan kay professional kaayo ang suspetsado nga naglakaw lang human sa krimen,” sumala pa ni SPO3 Alburo.

Samtang duna say report nga ilang nakuha ang kapulisan nga ang biktima giingong lain usab kinig taras kun mahubog. – BANAT NEWS