Gidunggab pag-unay sa iyang kainom angol

CEBU, Philippines - Duha ka managhigala kinsa nangalasbag sa ilang inom, nag-unay og away nga misangpot sa pagpanunggab didto sa Brookside Valley sa barangay Lahug, dakbayan sa Sugbo kagahapon sa kaadlawon.

Ang biktima nailhan nga si Renato Zaspa, hingkod, samtang ang suspetsado mao si Diosdado Taborada, pulos nagpuyo sa Brookside Valley.

Usa ka ginganlan og Rodel kinsa nakasaksi sa maong hitabo mibutyag sa kapolisan nga sa sayo pa nag-inom ang biktima ug ang suspetsado ug dihang nangalasbag na, mitumaw ang mainiton nilang lalis.

Dihang nahutdan na sa katarungan ang suspetsado, milanit kini sa iyang kutsilyong iyang gitangkil ug giduslak ang biktima.

Ang biktima nga nasabak sa tiyan gihatod dayon ngadto sa Cebu City Medical Center, samtang ang suspetsado nagpahayahay na karon sa prisohan human siya masikop sa mga otroridad sa kapolisan   human sa maong hitabo. (Lesley Caminade)   (BANAT NEWS)