Nagselos sa tomboy nga kapuyo naghikog

CEBU, Philippines - Gidudahang tungod sa selos nagpakamatay ang usa ka babayeng dunay kapuyong tomboy diha sa sitio Galaban barangay Poblacion lungsod sa Borbon nga nakit-ang patay na kagahapon sa alas 5:30 sa sayong buntag.

Ang nagpakamatay mao si Jovelyn Sancho Villaroque, 34, dalaga apan dunay kapuyo nga tomboy nga si Mayla Cumba.

Matud pa ni PO3 Edgar Novabos sa Borbon Police dihang nahinabi sa Banat News, usa ka Joselito Codo molupyo sa maong lugar ang mitawag ug mipahibawo sa ilang buhatan kabahin sa giingong babayeng naghikog.

Apan pag-abot sa mirespondeng mga polis sa maong lugar gikuha na ang patay’ng lawas ni Villaroque nga unang nakit-ang patay nga nagkumbitay sulod sa kwarto sa pinuy-anan niini nga dunay higot nga electrical wire sa liog ug ang pikas tumoy gihigot sa ibabaw nga bahin sa kahoy sa panimalay.

Ang kapuyo niining tomboy mao nay nakadiskubre sa patay’ng lawas niini nianang sayo sa buntag sa iyang paghimata.

Atol sa pagsukit-sukit sa kapulisan gibutyag ni Cumba nga nianang pagka-gabii nagkalalis sila niini may labot sa selos hinungdan nga nangluod ug wala na kini mohigda sa ilang lawak ug naglain og katulog sa pikas kwarto.

Apan dako nalang ang iyang kakugang dihang nakit-an nalang niya kining nagpakamatay nianang sayo sa buntag.

Sa paghimo ning balita gitakda pang ipa-autopsy ang patay’ng lawas niini.   (Darrel Carumba ug Guam Logroño)   (BANAT NEWS)