Numero uno nga 'pusher' natiklo sa korte

CEBU, Philippines - Nasikop na sa kapulisan ang gihulagway nga idlas ug numero unong drug pusher sa lungsod sa Tuburan human sa pipila ka bulan nga pagpangita niini.

Ang suspetsado giila sa kapulisan nga si Johnny Ylanan, 32, taga barangay 5 Poblacion, Tuburan nasikop pinasikad sa warrant of arrest sa kasong paghupot og armas nga walay lisensiya.

Si Chief Insp. Timmar Alam ang hepe sa Tuburan Police Station nga gikahinabi sa Banat News nagkanayon nga si Ylanan nasikop sa dakbayan sa Toledo sa Regional Trial Court Branch 29 samtang nagtambong sa kaso niining illegal drugs.

Matud pa nga naaktuhan usab nga ang iyang mga sakop nga sila si SPO3 Lino Delos Santos ug mga kaubanan   mitambong usab sa laing husay sa kaso.

Nunot niini mimando gilayon siyang sikupon si Ylanan kay nalutsan kini’g warrant of arrest niadto pang Pebrero 11 ning tuiga gumikan sa paghupot og armas nga walay lisensya.

Gibutyag niini nga dugay na nilang gipangita si Ylanan ug niadto pa kining milabay’ng tuig nga nagtago-tago human usab maka-ipsot sa ilang mga pagpang-ronda labot na sa pagpamaligya niini og ilegal nga drugas.

Sumala pa niini nga ang operasyon ni Ylanan dili lang sa Tuburan kun dili maabot pa sa mga silinganang lungsud sa Tabuelan, Asturias ug Balamban, apan gumikan sa kadaghan niining kontak sa nahisgutang mga lugar naglisod sila’g dakop niini. (Guam Logroño)    (BANAT NEWS)