CEBU, Philippines - Patay ang usa ka habal-habal driver human gitusak-tusak sa pagdunggab sa iyang silingang mag-uuma sulod sa usa ka videokihan niadtong Biyernes sa gabii didto sa barangay Tabon lungsod sa Dalaguete.
Si PO2 Allan Sanoy sa Dalaguete Police Station nga gikahinabi sa Banat News miila sa biktima nga si Pedro Ambrad, 19, samtang ang suspetsado mao ang iyang silingang mag-uuma nga si Francisco Obiedo.
Si PO2 Sanoy nagkanayon nga ang biktima ug si Obiedo nga hubog nangadto sa usa ka videokihan sa ilang silingan.
Matud pa nga samtang diha na sila sulod sa videokihan si Ambrad ang na- busy sa pagpamili’g kanta dihang kalit lang gikuptan ang iyang duha ka kamot sa suspetsado ug gidunggab sa hunting knife diha sa nagkadaiyang parte sa kalawasan.
Human sa pagdunggab ang suspetsado daling misibat samtang ang biktima wala na madala sa hospital gumikan sa daghang samad sa lawas nga nahiaguman.
Nakuha sa kapolisan ang hunting knife nga gigamit sa maong krimen nga gi-turnover sa maguwang sa suspek.
Sa gipahigayong hot pursuit operation nadakpan ang suspetsado ug kini sa pasiunang tubag miangkong gidunggab niya ang biktima kay gi-unhan siya niini. (BANAT NEWS)