Batang 7 anyos dasmagan angol

CEBU, Philippines - Naangol ang usa ka 7 anyos nga batang babaye dihang nadasmagan kini sa sakyanan sa iyang paglabang sa karsada didto sa barangay Lugo sa lungsod sa Borbon niadtong Huwebes sa alas 2:00 sa hapon.

Ang biktima mao si Claire Arong, 7, nga taga Lugo, samtang ang drayber sa Honda Civic nga nakadasmag niya mao si Ryan Joseph Go Emnace, hingkod, nga taga barangay Pajo, siyudad sa Lapulapu.

Si PO3 Edgar Novabos sa Borbon Police Station mibutyag sa Banat News nga ang sakyanang nakadasmag sa biktima nagbaguros ang dagan paingon sa dakbayan sa Sugbo gikan sa amihanang bahin sa lalawigan dihang pag-abot niini sa Lugo misuway kini og overtake sa gisundan niining Ceres Bus. Apan nasanta kini dihang kalit lang mitabok sa karsada ang biktima ug wala na makontrolar sa drayber ang preno sa sakyanan hinungdan nga nadasmagan gyud ang biktima ug maayo nalang kay wala kini maligsi sa ligid.

Nalamba ang bata ug nahiagom kini sa mga bali sa lawas, mga pangos ug mga bun-og ug gihatod dayon kini sa drayber sa sakyanang nakadasmag kaniya ngadto sa tambalanan sa Juan Dosado Memorial Hospital sa Sugod nga nagkadugo.

Apan gibalhin kini sa tambalanan sa dakbayan sa Sugbo aron pagsiguro nga masalbar ang iyang kinabuhi. Gipasalig ni Emnace nga siya'y moabaga sa gasto sa hospital sa biktima. – BANAT NEWS