3 langyaw nadisgrasya

CEBU, Philippines - Tulo ka mga langyaw duha niini Indian national ug usa ang German ang naangol dihang nadisgrasya ang ilang mga motor nga gisakyan sa highway sa barangay Tomonoy sa lungsod sa Moalboal niadtong Martes sa alas 6:10 sa gabii.

Ang mga naangol mao ang drayber sa motorsiklong Honda TMX nga si Kumar Rajinder, 23, usa ka Indian, ug kauban niining sakay sad og Honda XRM nga si Parmjit Sight, 26, pulos taga Carcar samtang ang German national nga na-angol mao si Gurt Otto Danner, 67, nagpuyo sa maong lugar.

Matud pa ni PO1 Camelo Zapra sa Moalboal Police dihang nahinabi sa Banat News sila si Kumar ug Parmjit nga nag-negosyo og lending   gikan nga naningil sa ilang mga kustomer ug paingon na unta mopauli sa Carcar.

Si Kumar maoy nag-una ug nagsunod ang motorsiklo ni Parmjit apan pag-abot sa maong lugar nakasugat kini og traysikol nga nag-zigzag ang dagan maong gilihayan niya kini apan nalamba na hinuon kini sa pikas nga bahin sa karsada.

Ang nagsunod nga si Parmjit naningkamot unta nga makalikay apan mao na usab kini ang nadasmag kay wala na niini mapugngi ang manobela sa motorsiklo.

Pulos nakaangkon og daghang pangos sa kalawasan ang duha ka langyaw ug wala magdugay nahiagi sa maong lugar ang German nga nagmaneho og traysikol ug nasaghiran ang motosiklo ni Parmjit.

Tungod sa kakalit sa hitabo wala makabantay si Danner ug nawad-an usab og kontrol sa iyang traysikol hinungdan nga kini nabalintong ug nakabali sa walang tiil niini, silang tulo pulos gihatud sa Badian District Hospital ug luwas na sa makuyaw nga kahimtang.

Samtang ang German national gilahos sa tambalanan dinhi sa dakbayan sa Sugbo tungod kay operahanan ang bukog sa walang tiil niini. – BANAT NEWS