Kaalyado ni Radaza wala mabalaka

CEBU, Philippines - Si Lapulapu City ABC presidente Leo Mercado, ang tigpamaba sa kampo ni Lapulapu City Mayor Arturo Radaza mipadayag nga wala sila mahadlok sa plano ni Engr. Rolando Patalinjug nga magpapili pagkamayor sa dakbayan sa Lapulapu.

Matud pa niini daan na silang nahibalo niini dihang ang mga lider sa oposisyon sa una pa magtigom-tigom ug nagplano na kaniadto pang gun-obon ang administrasyong Radaza.

Samtang si Lapulapu City ABC president ug Pajo barangay kapitan Leo Mercado, tigpamaba sa kampo ni Radaza mipadayag nga daan nang nahibalo si Mayor Radaza sa plano ni Patalinjug, apan wala mahulga ang mayor kalabot niini.

Si Mercado mipadayag nga nagkasamot og kalig-on ang ilang partido diin gawas nga si Lapulapu City First Lady ug Mactan barangay Kapitan Paz Radaza maoy gituboy sa ABC ug Konseho mosuporta gyud ang kanhing mga asawa sa mga kanhing mayor sa dakbayan sa Lapulapu nga sila si Norma Patalinjug (asawa ni kanhi Mayor Max Patalinjug) ug Pie Wiegle (asawa ni kanhi Mayor Ernest "Jun" Wiegle).

Gipanghimakak usab ni Mercado ang mga alegasyon ni Patalinjug sa kakulang sa mga basic services ug drainage systems tungod kay makita man kini karon sa dakbayan ug ang uban padayon pang gi-construct.

Hinuon gihangop sa kampo ni Radaza ang lakang ni Patalinjug sa pagpapili pagkamayor kay iya usab kining katungod. - Bong Soriano (BANAT NEWS)