Linog miigo sa Cebu ug Leyte

CEBU, Philippines - Usa ka linog ang nitay-og sa Biliran Province ug dinhi sa Sugbo niadtong milabay’ng Miyerkules sa alas 5:17 sa hapon nga nirehistro og 4.9 ang magnitude.

Gibutyag ni Georgio Robinson sa Phivolcs dihang nahinabi sa Banat News nga namatikdan ang maong linog nga gihulagway’ng dili kaayo kusog sa mga lugar sa Biliran Province, Tacloban, Palo Leyte ug Cebu.

Matud pa ni Robinson ang maong linog dunay gilawmon nga 73 kilometros nga naggikan sa Philippine Fault.

Ang Biliran province maoy nirehistro og intensity 4, samtang intensity 3 sa Tacloban City, intensity 2 sa Palo, Leyte ug intensity 1 sa Cebu ug Ormoc City.

Matud pa ni Robinson ordinaryo lang ang maong linog nga dili makaguba og mga dagkung edipisyo.

Sa paghimo ning balita walay nadawat nga report sa kadaut ang Phivolcs gikan sa mga apektadong lugar gawas lang sa report nga ilang nadawat nga nagpahibawo sa namatikdan nilang linog. - Darrel Carumba (BANAT NEWS)