Pabrika sa plastik pasilutan

CEBU, Philippines - Mibahad ang kagamhanan sa dakbayan sa Talisay nga silotan ang tagdumala sa ISJ Plastic Center (IPC) nga nagbase sa sitio Pang-pang, barangay San Isidro, dakbayan sa Talisay gawas lang kun nakatuman kini sa mga requirements nga gisitar sa balaod niining pag-abli nila pagbalik sa ilang pabrika.

Ang maong bahad gihimo ni Talisay City Administrator Richel Bacaltos sa pakighinabi sa Banat News mipasidaan sa pagkanselar sa permiso sa maong pabrika kun masayrang ilegal ang ilang pagpangabli pag-usab.

Ang bahad ni Bacaltos gihimo agi’g reaction niya dihang nasigpatan niya ang panon sa mga molupyo sa Pang-pang nga miadto sa City Hall sa Talisay aron sa pagpalanog sa ilang kabalaka niining pagbukas na usab sa IPC sa ilang lugar.

Nasayran gikan kang Kapitan Maria Adelaida Restauro sa San Isidro   nga niadtong miaging Hunyo niining tuiga temporaryong gipahunong sa ni Mayor Socrates Fernandez ang IPC human madawat ang nagpungasi nga reklamo sa katawhan bahin sa kabaho sa ila ng palibot gumikan sa mga plastik nga tunawon sa maong pabrika.

Dihang gisuta kini sa buhatan sa mayor, nasayran nga walay mga hustong papeles ang maong pabrika hinungdan nga gipasirhan kini ug gisaaran nga makaabli lamang    pag-usab kun makatuman na sa gikinahanglang mga papeles.

Apan nakurat nalang ang mga molupyo niadtong Hulyo dihang giablihan kini pag-usab bisan kun walay hustong mga papeles ug wala pa makatuman sa mga requirements nga gipangayo sa mayor.

Gitataw ni Restauro nga illegal gyud kaayo ang operasyon niining IPC kay ang permisong gilukat niini, para ra sa usa ka bodega o warehouse apan naunsa ba nga tunawan man diay kini sa plastik nga naghatag og risgo sa panglawas sa mga tawo sa palibot sa maong pabrika.

Ang kapitan mibutyag usab nga ang konseho sa siyudad mihatag og usa ka buwan sa ISJ Plastic Center nga makatuman sa tanang panginahanglan aron nga dili kini masirad-an.

Si konsehal Bernard Odilao kinsa maoy tsirman sa komitiba sa kalikupan wala gyud makahatag og pamahayag kalabot ning maong isyu kay dili siya motubag kun tawgon sa iyang cellular phone. - Brenda D. Batuto (BANAT NEWS)