22-anyos nagbitay na sa punoan sa lubi tipi

CEBU, Philippines - Patay nang nakit-an nga nagbitay sa punoan sa lubi ang usa ka 22- anyos nga lalaking gituohang naghikog sa sitio Sac-on barangay Mulao lungsod sa Liloan niadtong Miyerkules sa alas 6:00 sa buntag.

Ang nagpakamatay mao si Charlie Llave Lungtad, 22, molupyo sa nahisgutang lugar ug stay-in worker sa 3H goat farm work nga nagbase sa maong dapit.

Matud pa ni SPO1 Claudio Castro Jr. sa Liloan Police dihang nahinabi sa Banat News , ang kauban sa trabaho ni Lungtad nga si Renante Manguilaya maoy nakadiskubre nianang pagmata niya sa buntag nga patay na kini.

Si Lungtad nagbitay sa puno-an sa lubi nga dunay higot nga pisi ang liog ug ang pikas tumoy gihigot sa ibabaw’ng bahin sa puno-an sa lubi.

Sa pag-reSponde sa kapulisan sa maong lugar gitangtang na sa mga kabanay ug kauban niini ang patay’ng lawas, ang municipal health officer nga si Francisco Dela Cuesta maoy nikumpirmar nga patay na gyud kini.

Matud ni SPO1 Castro ang mga kabanay sa biktima pulos nagdumili pagtug-an kabahin sa posibleng hinungdan sa pagpakamatay niini ug sa pasiunang pakisusi sa kapulisan gidudahan nilang may kalambigitan sa gugma o ba kaha problema sa pamilya si Lungtad. - Darrel Carumba (BANAT NEWS)