May Charter Day bonus ang Mandaue CH workers

CEBU, Philippines - Ang mokabat sa 550 ka mga regular nga kawani sa city hall sa dakbayan sa Mandaue ang makadawat og P5,000 nilang Charter Day Anniversary bonus karong tuiga. Ang ika-40 ka tuig nga kasumaran sa pagkahimong dakbayan sa Mandaue ang gikatakdang saulogon karong Agosto 30.

Si Konsehal Emiliano Rosal nga maoy chairman sa committee on budget and appropriations sa konseho nga nahinabi sa Banat News nagkanayon nga maggikan kini sa naaprubahang Supplemental Budget No. 1 sa miaging regular session sa konseho.

Matud pa niya nga sa milabay’ng charter day P3 mil ra ang bonus apan gumikan kay 12 na ka tuig ang nangagi mao ra gihapoy nadawat sa mga kawani maong ilahang nasabutan nga padak-an kini.

Dugang pa ni Rosal nga ang mga kawani nga nakaserbisyo sa dakbayan og unom ka bulan apil sa makadawat og bonus apan P2,500 ra, samtang ang nakaserbisyo sulod sa napulo ka bulan mokabat usab P3,750 ang ilang madawat niini. - Romeo Limpangog (BANAT NEWS)