''Business Interest'' Ni Cabrido Gibutyag

CEBU, Philippines - Gikasagmuyo ni Bise Mayor Carlo Fortuna sa dakbayan sa Mandaue ang giluwatang pamahayag nila Atty. Briccio Boholst ug Edmund Sanchez ug gihulagway niyang milipat sa publiko pinaagi sa pagluwat og pamahayag nga wala maggikan kaniya. Si Fortuna sa gipadalang pamahayag sa Banat News kagahapon, miangkong nahibawo na siyang daan nga pasirad-an gyud ang dumpsite sa Umapad tungod kay nakadawat na siya sa unang notisya niini dihang usa pa siya ka konsehal.

Giklaro sa bise mayor nga sila si Atty. Benjamin Cabrido ug Sanchez, usa ka higayon mibisita sa iyang buhatan ug mipahibalo kabahin sa proposal kun unsaon nila pag-atiman ang mga basura.

Matud pa niya nga propesyonal kaayo ang dagan sa ilang panagkita niadtong tungura kay kun dili pa, mokisi-kisi gyud si Cabrido, apan wala kini buhata ni Cabrido.

“If Sanchez lie was true when I said “unya unsa may amo”, he will surely not waste one second to denounced my statement in media after I have made strong reservations about their proposal. Why only now when I have exposed the business angle of the closure of the dumpsite?” matud pang Fortuna.

Matud pang Fortuna mas motuo siyang dihang gipakigkitaan siya sa duha may labot gyud kini sa usa ka multi-million garbage facility sa Consolacion.

“I am even more inclined to believe that when they went to see me, they went their as business associates presenting a plan that is connected to the multi-million peso garbage facility proposed to be constructed in a neighboring municipality,” matud pa sa statement.

Ang EDSA-MAN Manpower and Services nga natukod niadtong 2008, pila ka buwan una pa sa ilang panagkita ug nagpakita nga si Cabrido ug laing abogado ni Mayor Jonas Cortes mga incorporators sa negosyong gipanag-iya ni Edmund Sanchez, kansang pangalan sa kompanya gibase sa iyang pangalan.

Gikatahong giangkon usab ni   Cabrido nga si Sanchez, cousin in-law ni Cortes nga maoy special project consultant sa mayor nga pareho niyang mga kliyente.

Gibutyag usab ni Fortuna nga duna siya’y mga sources sa legal profession nga si Cabrido ug Boholst suod nga managhigala ug si Cabrido kanhi law partner sa laing abogado sa mayor nga si Atty. Bagaslao.

Matud pa ni Fortuna ang maayong relasyon nilang Cabrido uban ni Cortes ilabi na ni Sanchez ug administrator Boholst dili na mahimong maibot pa bisan pa usa ka declaration of independence.

“His declaration that his loyalty to his client ends when his advocacy to the environment begins is all posturing. How about his loyalty to his business, will it also end?” pangutana pang Fortuna. Tungod sa pagpresentar niini og managlahing interes, nakahimo og unethical ug unprofessional conduct ilawom sa Code of Professional Responsibility si Cabrido ug di na kini masaligan kun patas ug impartial.

Samtang usa ka interbyu sa DyRF, giangkon ni Cabrido ang pasangil ni Fortuna nga usa siya sa mga abogado ni Cortes ug corporate lawyer sa negosyo ni Edmund Sanchez ang sinaligan sa mayor sa Mandaue.

Apan iyang gitataw nga dili kini makababag sa iyang pagpasaka og kaso batok sa bise mayor sa siyudad ug ubang mga miyembro sa mayoriya sa konseho sa Mandaue.

 Gipahibawo ni Cabrido nga bisan og abogado siya ni Cortes iya kining gi-pressure pagpatuman sa solid waste management hinungdan nga misitar og P33 milyones si Cortes alang sa katumanan sa maong programa. (Rey Pasaporte ug Chester Abadilla)   (BANAT NEWS)