Administrator sa Balili lot gigisa sa hunta

CEBU, Philippines - Gigisa sa mga sakop sa hunta probinsiyal ang property administrator sa pamilyang Balili nga si Atty. Romeo Balili atol sa sesyon kagahapon sa hapon.

Gi-una gyud sa agenda sa sesyon sa hunta probinsiyal mao ang kontrobersiyal nga pagpalit sa Kapitolyo sa lote sa pamilyang Balili didto sa barangay Tinaan, lungsod sa Naga nga kantidad nga 98 milyones ka pesos.

Usa sa misukitsukit ni Balili mao si Bokal Victor Maambong, chairman sa committee on environment sa   hunta probinsiyal kinsa kun makapili makig-tagbo ngadto kang bukal Juan Bolo. Iya usab nga gitataw nga wala gyud maglimbong sa pamilyang Balili sa pagbaligya sa maong lote kun limpyo ang ilang titulo ug wala siya'y nahibaw-an nga reversion sa ilang lote pinaagi sa DENR.

Samtang sa interbiyu sa DyRF, si Bolo nangugat sa pagdepensa sa titulo sa lote sa pamilyang Balili   pinaagi sa pag-ingon nga dili na makapanghilabot sa maong lote ang DENR.

Nagkanayon si Bolo nga dili makapahigayon og reversion ug makakansela sa land title ang DENR sa lote nga na-develop sa tag-iya bisan pa man og natabunan na sa tubig dagat kay ang desisyon sa Korte Suprema niadtong tuig 2007 sa kasong Republic of the Philippines vs. Mendoza   nagtumbok nga dili makansela ang titulo.

Matud pa ni Bolo nga ang basehanan sa korte mao ang Presidential Decree 43 nga nagtugot nga matitulohan ang “slams and mangroves” ubos sa Bureau of Fisheries and Aquatic Resources apil na ang public land nga natabunan sa dagat.

Si Bolo mitumbok usab nga may kaso pa sa tuig 2005 diin ang Korte Suprema mitumbok nga bisan ang propriedad nga napalit pinaagi sa fraud sa legal owner, ang third party sama sa DENR, walay labot kay protektado sa maong balaod.

Midugang si Bolo nga dili makonsiderar ang pagpangayo og pasaylo ni Gobernador Gwendolyn Garcia pag-angkon sa kasaypanan sa lalawigan tungod kay dili man abogado ang gobernadora.

Samtang si   Atty. Benjamin Cabrido mibaraw sa gibasehan ni   Bolo nga desisyon sa Korte Suprema sa pagtumbok nga matituluhan ang lote sa pamilyang Balili.

Si   Cabrido nagkanayon nga dili mahimong jurisprudence ang kasong Republic of the Philippines vs. Mendoza sa pagtino sa kabalido sa titulo sa lote   bisan pa man og nalubog kini sa dagat. Matud pa ni Cabrido nga sa nahisgutan kaso, ang reversion sa lote atol man sa pagpalit niini apan lahi sa lungsod sa Naga tungod kay ang reversion sa DENR sa maong lote human na   sa pagpalit sa Kapitolyo.

Gipasabot usab ni Cabrido nga ang gigamit sa pagpalit sa lote sa Balili iya man sa gobiyerno ug dili sa usa ka pribadong indibiduwal.

Si Cabrido mitumbok usab nga sa unang kaso wala ma-establisar sa Solicitor General ang “fraud” kon “ilad” sa pagpalit sa maong luna nga sukwahi sa nahitabo sa pagpalit sa Kapitolyo sa luna sa lungsod sa Naga. (Chester Abadilla ug Rey Pasaporte)   (BANAT NEWS)