Mga kaso sa illegal drugs ipadawat sa piskal

CEBU, Philippines - Ang mga kaso bahin sa illegal nga drugas gihingusgan sa Dangerous Drug Board (DDB) nga dawaton gihapon sa mga buhatan sa prosecutor sa tibuok nasud gikan sa kapulisan bisan kun wala pay resulta sa chemistry clinical analysis sa PNP-Crime Laboratory.

Kini maoy sugyot ni Dangerous Drugs Board (DDB) Undersecretary Atty. Clarence Paul Oaminal, dihang gikahinabi sa Banat News.

Si Oaminal gitakdang molarga karong adlawa ngadto sa kaulohan aron sa pagduso niining maong sugyot ngadto sa Department of Justice (DOJ) Manila.

Matud pa ni Oaminal nga iyang ipadangat ang iyang suwat sugyot ngadto kang DOJ Secretary Agnes Devenadera nga kinahanglang dawaton gihapon sa piskaliya sa tibuok nasud ang tanang kaso sa illegal drugs bisan wala pay resulta sa Chemistry Clinical Analysis.

Sumala pa niya nga gumikan sa kalayo sa PNP-Crime laboratory sa ubang mga estasyon sa kapolisan sa nasud maoy hinungdan nga buhian nalang sa kapulisan ang ilang dinakpan bahin sa illegal nga drugas   tungod sa kadugay sa resulta sa laboratory test niini.

Gipasabot niya nga sa maong sugyot ang mga Municipal ug City Municipal Health Officer ug medical technologist sa kalungsoran mahimong mao nay mo-abag sa kapulisan sa pagluwat og test result niining mga illegal nga drugas nga masakmit sa kapolisan.

Alang kaniya nga sa maong pamaagi mapadali ang pagpasaka og kaso sa mga tawong nalambigit sa illegal nga drugas .Samtang gibutyag niya nga ang mga municipal ug city health officer ipa-ubos usab sa pagbansay ug akreditasyon sa Philippine Drugs Enforcement Agency (PDEA) ug DDB.  (BANAT NEWS)