Tawong gikahadlokan sikop

CEBU, Philippines - Usa ka malditong tawo kinsa wala pa katilaw sa mga killer nga vigilante o killer nga magmotor, gisikop sa mga barangay tanod didto sa sitio Tigib, barangay Lagtang, dakbayan sa Talisay niadtong Sabado sa gabii.

Busa naglumpayat sa kalipay ang mga silingan, dihang kini si Junnel Abatayo, hingkod, nga taga Tigib, nasikop kay matag higayong mahubog kining tawhana magpunay kuno og panghagit og pinatyanay dala ang iyang pinuti nga iwarawara samtang mowaldas sa iyang mga silingan.

Si Kapitan Celiapo Cabuenas sa Lagtang nagkanayon nga iyang gipasikop si Abatayo dihang may mga silingan ning tawhana nga mitawag kaniya ug nagpahibawo nga ginerbiyos na usab sila ug nangurog sa kahadlok kay nanghagis na usab si Abatayo.

Matud pa ni Abatayo nga daghan na siyang nadawat nga mga reklamo nga naghangyo nga ipahipos si Abatayo kay daghan nang gisak-an og kabuhi sa ilang lugar tungod sa kaisog ni Abatayo.

Ang mga tigpaniid nagkanayon nga ang kinaiya ni Abatayo humot kaayo sa mga vigilante ug sa mga killer nga magmotor.

Hinuon sa pagkakaron nakasibat na si Abatayo human buhii sa kapolisan kay wala may mipasaka og kiha kaniya sa kahadlok nga habason sa iyang pinuti.

Miingon si Cabuenas nga kadaghan na kini hidakpi sa mga otoridad apan gumikan kay walay makaako sa pagpasaka og kaso, mabuhian dayon siya sa kapolisan ug dili gyud mabilanggo og dugay.

Wala pa hisayri kun mobalik pa ba sa ilang balay si Abatayo, apan ang mga silingan nabalaka, basin pakigkitaan kini sa mga vigilante. – BANAT NEWS