Bata naligsan sa trak sa mayor

CEBU, Philippines - Maayong pagkapisat sa lawas sa usa ka 5-anyos nga batang lalaki human kini malatayi sa usa ka dump truck sa barangay Abucayan lungsod sa Balamban niadtong milabay’ng adlaw.

Ang biktima giila sa kapulisan nga si Rey John Navarro, 5, nga nagpuyo sa nahisgutang lugar nga namatay diha-diha gilayon gumikan sa grabeng naangkon sa iyang kalawasan. Si PO2 Jose Baldecasa sa Balamban Police Station nga gikahinabi sa Banat News nga ang dump truck RFD-570 gimaneho ni Danny Sagolili ug gipanag-iya ni Mayor Allan Adlwan sa lungsod sa Asturias.

Matud pa ni PO2 Baldecasa nga ang dump truck paingon unta kini sa lungsod sa Asturias niadtong higayuna nga nagsubay sa national highway dihang pag-abot sa nahisgutang lugar.

Kalit lang nga nilabang ang biktima didto sa pikas dalan hinungdan nga sa kakalit sa hitabo wala na maka-brake pa ang driver ug nalatayan gyud ang biktima ug maayong pagkapisat niini.

Ang driver nga si Sagolili ang kasamtangang gitanggong sa Balamban Police Station samtang gihikay pa ang tukmang kaso nga ipasaka batok niini.