Kawatan gipatay sa sikyu

CEBU, Philippines - Patay ang usa ka gikatahapang kawatan dihang gipusil sa guwardiya sa gitukod nga building tungod kay giingong buot untang mangawat sa mga construction materials sa site diha sa barangay Marigondon, dakbayan sa Lapulapu alas-4 pasado ang takna sa miaging kaadlawon.

Ang namatay mao si Rolito Nillarma, 25, nagpuyo usab sa luyong bahin sa maong dapit ug samtang ang suspetsado nga nagpusil sa biktima mao si Jimbo Labrador, guwardiya nga nadestino sa maong construction site sa Imupa Village.

Si PO3   Candido Baringue sa homicide section sa kapolisan sa maong dakbayan miingon nga gialegar sa guwardiya nga alas- 4 pasado ang takna kagahapon sa kaadlawon namatikdan niining may tawo diha sa site.

Sa dihang gisusi, iyang nakit-an si Nillarma nga nanghulbot sa mga tubo hinungdan nga iyaha kining gibadlong apan gikatahong wala hinuon siya panumbalinga niini ug mipadayon sa iyang pagpanghulbot sa tubo.

Tungod niini gipusil sa suspek ang biktima hinungdan sa pagkaigo ni Labrador sa lawas ug namatay.

Si PO3 Baringue miingon nga ang suspetsado kinsa diha pa gihapon sa crime scene sa ilang pagresponde sa maong lugar ang boluntaryong mitahan ngadto kanila uban sa armas nga kalibre .38

Si PO3 Baringue miingon nga gitanggong karon sa bilanggoan ang suspetsado ug mag-atubang gihapon kini og kaso. – BANAT NEWS