1 patay, 10 angol sa 3 ka aksidente

CEBU, Philippines - Usa ka tawo ang patay samtang napulo usab ang naangol sa duha ka managlahing aksidente sa kadalanan niadtong Sabado sa barangay Basak ug kagahapon sa barangay Calamba ug barangay Banilad.

Sa Banilad, usa ka family driver ang natusok sa tubo sa railings nga iyang gibanggaan ug samdan usab ang anak sa iyang among iyang pasahero human mosampak ang gimaniho niining Toyota-Altis pasado alas dose sa buntag sa Gov. Cuenco Avenue sa barangay Banilad.

Ang namatay mao si Catalino Amoro Godornes, 54, molupyo sa Cabangcalan syudad sa Mandaue samtang ang naangol mao si Robert Ryan Yap, 21, taga North Town Homes Subd. sa Talamban nga nakaangkon og gamay'ng samad sa kalawasan.

Sa imbestigasyon nga gipahigayon sa Cebu City Traffic Group Division nasayran nga si Godornes ug si Yap padulong nga mouli sa Talamban gikan sa Guadalupe.

Gikatahong pag-abot sa maong dapit mi-overtake kini sa usa ka taxi apan nawad-an og kontrol ug miigo sa railing, tungod sa kakusog sa impact usa sa mga tubo ang milusot sa atubangan ug milahos sa manobela una pa moigo sa tiyan ni Godornes.

Matud pa ni PO3 Armando Bañoc sa pakighinabi sa Banat News, wala pa sila masayod sa kinatibuk-ang detalye sa hitabo sanglit si Yap wala pa nila makuhai og pamahayag.

Sa laing bahin aksidente, upat ka tawo ang naangol dihang tulo ka sakyanan ang nagbangga human makatulog ang drayber sa usa sa mga sakyanan kagahapon sa udto.

Si Kenneth Christian Matura 19, nga drayber sa usa ka Mitsubishi Estrada mitug-an sa kapolisan nga nakatagpilaw siya samtang nagmaneho subay sa V. Rama padulong sa Labangon.

Ang nangasamdan nailhan nga sila si Nestor Acbayan, Aldin Tapaya ug Gonzalo Wagas, Buenvinido Mainit nga drayber sa PUJ ug ang usa ka batan-ong wala pa mailhi.

Sumala pang Bañoc unang nabanggaan ni Matura ang PUJ ni Mainit apan tungod sa kakusog natuyok ang jeepney ug didto miigo nila Acbayan, Tapaya ug Wagas lakip na ang usa ka gi-parking nga Pajero.

Ang sakyanan ni Matura nalahos usab sa usa ka tindahan ug nadasok ang gi-parking nga motor.

Matud pa ni Bañoc nga sa resulta sa gipahigayon nga liquor test kang Matura positibong nakainom kini og bino.

Lima ka tawo ang naangol human ang ilang gisakyang mini-bus ang midumbol sa usa sa mga haligi sa skywalk diha sa barangay Basak dakbayan sa Sugbo niadtong Sabado sa hapon.

Ang mga naangol mao sila si Ina Cabanes, 27, taga lungsod sa Carcar, Jerryville Dumdum, 25, taga lungsod sa Naga, Elizabeth Stiverot, 27, taga lungsod sa Balamban, Marivic Esbra, 40, taga lungsod sa San Fernando ug Erlinda Campucan, 57, taga barangay Guadalupe, Carcar.

Ang mga biktima ang daling gidala ngadto sa Cebu City Medical Center (CCMC) samtang ang drayber sa JBH-Trans Minibus nga nagtangag sa plakang GWX-759 nga dunay rotang Carcar-Cebu padayon pang gipangita sa kapolisan.

Si SPO1 Dionesio Galo, imbestigador sa Cebu City Traffic Division sa pakighinabi niini sa Banat News kagahapon mibutyag nga wala nila mailhi ang drayber tungod kay human sa hitabo misibat kini gibiyaan ang iyang gimanehong sakyanan.

Ang tag-iya usab sa minibus wala pa usab motungha hangtud kagahapon diha sa ilang buhatan aron sa pagkuha sa sakyanan niini nga gi-impound.

Matud ni Galo nga ang nahisgutang minibus ang gikan sa lungsod sa Carcar ug gituohang kusog ang dagan niini ug wala na makontrolar sa drayber ang manobela hinungdan nga pag-abot diha sa lugar misampak kini sa maong haligi.

Si Galo midugang nga kasong reckless imprudence resulting to multiple homicide ug damage to property ang gikatakdang ipasaka batok sa drayber. – BANAT NEWS