Mga kapitan molayat gikan sa BOPK sa 2010 gihinginlan

CEBU, Philippines - Gisalikway ni   ABC president Eugenio Faelnar ang posibilidad nga dunay kaalyado nilang mga barangay kapitan nga manglayat sa oposisyon kun dili madala sa line-up sa Bando Osmeña Pundok-Kauswagan (BOPK) pagkakonsehal sa siyudad sa 2010 elections.

Nakasiguro si Faelnar nga magpabilin sa ilang grupo ang dili madala nga mga kapitan sa line-up sa BOPK pagka-konsehal sa dakbayan tungod kay kini giingong mga loyalista.

Midugang ang ABC president nga wala usab siya makahinumdum nga dunay mga kapitan nga milayat sa oposisyon kaniadto tungod kay wala masulod sa line-up sa ilang grupo.Apan gitataw sa ABC president nga kung duna sila karoy kaalyadong mga barangay kapitan nga naghuna-huna nang daan og ingon niini, sila gihinginlan nang daan ni Faelnar.

“Kanang klasiha sa tawo nga kun dili gani matuman ilang gusto mobali, mas maayo pay mobali na silang daan, hain na man dapita diha imong leadership,” dugang ni Faelnar.

Duna na hinuoy nakitang solusyon si Mayor Tomas Osmeña nga dili mangluod ang kaalyado nilang mga barangay kapitan kung dili madala sa ilang line-up. Kini mao ang paghatag og mga proyekto nga tukuron sa ilang tagsa-tagsa ka barangay nga labaw'ng gikinahanglan sa mga konstituwente niini.

Sa kasamtangan, ang mga pangalan nila ni Luz barangay captain Nida Cabrera ug barangay kapitan Jose Marino Benedicto sa Zapatera maoy nag-una sa listahan sa north district. Samtang si Faelnar nga mao usab ang barangay kapitan sa Guadalupe maoy numero uno usab sa listahan sa south district uban sa asawa ni Konsehal Gerardo Carillo nga si Jaybee.

Sa nasayran, tulo ka konsehal sa amihanan ug duha usab sa habagatang distrito sa siyudad ang anaa na sa ikatulo ug katapusang termino.

Laing gikonsiderar sa BOPK nga kandidato pagkakonsehal sa north district mao ang usa ka ilado nga Non-Government Organization (NGO) worker.

Una nang gipadayag ni opposition leader Jonathan Guardo nga hangpon nila ang mga kaalyadong barangay kapitan sa BOPK nga motapon sa ilang grupo. – BANAT NEWS