3 gi-ambush sa Mandaue

CEBU, Philippines - Tulo ka gipasanginlang notadong tulisan nga mag-operate sa Consolacion ug dakbayan sa Mandaue ang gipamusil alas-11 pasado ang takna sa miaging gabii sa dalan H. Abellana sa barangay Canduman, dakbayan sa Mandaue, usa kanila ang namatay samtang grabeng naangol ang mga kauban niini.

Ang namatay mao si Benjie “Badong” Lacson, taga Tugbongan, Consolacion samtang grabeng naangol sila si Danilo “Dandan” Miano, 26, ug Ariel Parcon, 31, nga pulos taga barangay Jagobiao sa nahisgutang dakbayan.

Si PO3 Romel Lim sa homicide section sa kapolisan nga nahinabi sa Banat News miingon nga duha ka wala mailhing mga lalaking nagsakay og itom nga motorsiklo maoy nagbanhig sa mga biktima.

Dugang pa niya nga paingon na pauli sa ilang panimalay ang tulo sakay sa motorsiklong kolor itom ug dihang kalit mi-overtake ang mga gikatahapan dayong pamusil kanila.

Matud pa ni PO3 Lim nga si Lacson naigo sa agtang ug dead on arrival na sa Mandaue City Hospital samtang ang gipamusil usab sa ilang kalawasan gidala sa Vicente Sotto Memorial Hospital sa dakbayan sa Sugbo. Si PO3 Lim nagkanayon nga ang tulo naapil sa listahan sa mga suspetsado sa mga nahitabong pagpanulis sa dakbayan nga magsakay og motorsiklo ug ingon man may kalambigitan sa illegal drugs. (Romeo Limpangog ug Bong Soriano)      (BANAT NEWS)