Mga anak gigulgol sa papa

CEBU, Philippines - Usa ka welder ang migulgol sa liog sa iyang duha ka mga anak ug naghikog sa iyang kaugalingon pinaagi sa pisi diha sa liog gumikan sa giingong pagpangabubho ngadto sa inahan sa mga anak kagahapon sa hapon diha sa sitio Sewages barangay Pusok, dakbayan sa Lapulapu.

Ang nagpakamatay mao si Roderick Rignos, 29, usa ka welder ingon man tag-iya’g vulcanizing shop samtang ang iyang mga anak nga iyahang gipatay mao sila si Sydney Rignos, 4, babaye ug Cedric Rignos, 5-anyos.

Si Raymond Rignos maguwang ni Roderick nga nakahinabi sa Banat News mibutyag nga nag-problema ang iyang igsuon sa iyang kapuyo nga si Charito Frias nga nagtrabaho sa Mepz 1.

Matud pa ni Raymond kanunay’ng mag-away ang duha tungod kay magselos ang iyang igsuon kay nagtuo kining may laing lalaking gikabuangan si Charito.

Sumala pa niini, usa ka semana nang wala mopauli si Charito sukad sila mag-away dihang nauli kining kaadlawon na, duna say higayon nga giingong nasakpan kini sa iyang igsuon nga may ka-estoryang laing lalaki.

Matud pa niini, nasakpan pa sa iyang igsuon ang inahan sa mga bata nga wala diha sa trabahoan bisan og kini nananghid nga mitrabaho ug nag-overtime.

Kagahapon sa buntag nakit-an niya ang iyang igsuon nanglakaw uban sa mga anak apan nianang pagkahapon nahibulong siyang wala niya kini igkita hasta ang mga bata.

Si Raymond nagkanayon nga iyang gilili sa bintana ug nakugang siya nga nagbitay na ang iyang igsuon nga nagluhod ug may cable wire ug basko sa liog, dihang ilang gisulod kuyog ang mga polis nadugangan ang ilang kakurat nga patay na usab ang duha ka bata.

Ang mga bata gikatahong naghigda pa sa katre nga may ginulgulan sa mga liog ug usa may tabon pang unlan nga nagkadugo, nagtuo si Raymond nga gipakatulog sa amahan ang mga bata una pa niya kini patya.

Nagtuo ang mga imbestigador sa kapolisan nga posibleng naghikot nalang ang amahan sa liog ug gihikot sa kisame kay dili na niya mahimo ang paghiwa sa iyang liog tungod kay may dakong hiwa sa liog nga nakit-an sa liog niini.   (BANAT NEWS)