Cuenco mosuporta kang Noynoy kun pagka-presidente ang daganan

CEBU, Philippines - Andam nga mobiya sa administration party si Cebu City South District Congressman Antonio Cuenco ug motapon ngadto sa Liberal Party aron lamang paghatag og suporta ngadto ni Senador Benigno “Noynoy” Aquino kun modagan kini sa pagka-presidente sa umaabot nga presidential election sa tuig 2010. Sigon sa report sa DyRF, si Cuenco miingon nga dili siya mopaluyo sa kandidato sa administration party nga mao ang Lakas-Kampi-CMD diin siya masakop kun modagan sa pagka-presidente si Noynoy Aquino sa presidential election sa tuig 2010.

Gihulagway sa kongresista nga haom kaayo sa pagka-kandidato sa pagkapangulo sa nasud si Noynoy tungod kay ang kinabag-an sa mga Filipino nagpakita og pagmahal kang Noynoy Aquino aron magpadayon ang nabiyaang kawsa sa iyang mga ginikanan nga sila si kanhi senador Ninoy Aquino Jr. ug kanhi presidente Cory Aquino.

Ug tungod niini, si Cuenco nagtuong dako ang kahigayonan nga makadaog si Noynoy sa pagka-presidente ug mosunod sa tunob sa iyang ginikanan.

Apan dili makapaniguro ang kongresista nga mohatag og kinatibuk-ang suporta ni Noynoy kun pagkabise- presidente lang ang iyang daganan sa 2010.

Subay niini, giawhag ni Cuenco ang mga Sugbuanong mga militanteng grupo ug uban pang cause-oriented groups ilabina sa mga batan-on nga mopasiugda og manifesto nga mag-awhag og pagsuporta kang Noynoy nga mokandidato sa pagka-presidente.

Nagtuo si Cuenco nga ang tanang mga Sugbuanon mosuporta gyud kang Noynoy tungod sa pagpunay og duol sa iyang inahan nga si Cory Aquino dinhi sa Sugbu aron mobisita ug mosimba sa Carmelite Monastery.   (Chester Abadilla)   (BANAT NEWS)