CEBU, Philippines - Patay ang usa ka ulitawo human kini mahagbong dihang nadakin-as sa iyang pagsaka sa Kawasan Falls niadtong Biyernes sa hapon sa barangay Matutinao lungsod sa Badian.
Ang namatay giila sa kapulisan nga si Erwin Parangan,21, taga barangay Madridejos lungsod sa Alegria human kini makaangkon og samad sa tuong bahin sa iyang ulo ug kilay.
Si PO1 Arnel Tandoy sa Badian Police Station nga gikahinabi sa Banat News nagkanayon nga ang biktima nga si Parangan naabot kini sa Kawasan Falls mga alas 3:00 pasado sa hapon niadtong Biyernes.
Uban sa iyang mga higala nga nangaligo sa Kawasan Falls, ug gikatahong misaka kini ngadto na sa ikaduhang falls sa maoy lugar apan giingon nga nadakin-as ug nahagbong didto sa ubos.
Sumala pa ni PO1 Tandoy nga gipahibalo nalang ang ilang istasyunan labot sa maong insidente human usab ang mga kauban sa biktima mipahibalo usab kang barangay konsehal Regin Bedico sa nahisgutang lugar labot sa insidente kinsa maoy daling milusad og search and rescue.
Hinungdan nga daling ni-responde ang ilang mga kaubanang police sa lugar diin ilang naabtan ang patay nang lawas sa biktima nga dunay samad sa tuong kilay ug tuong ulo.
Matud pa niini nga mga alas 5:30 pa sa hapon niadtong Biyernes gikatahong nawagtang si Parangan human mobiya sa pundok ug misaka sa ibabaw ug miambak.
Ang barangay councilor nga si Regin Bedico maoy nitabang sa mga batan-on pagpangita og nianang pagka alas 6:00 sa sayong kagabhion nakit-an ang biktima nga diha na ilawom sa dagat ug dali dayun nila kining gitabang ug gi-aswat paingon sa daplin ug didto ilaha pa unta kining gisuwayan og tabang apan patay na gyud kini.
Nagtuo ang kapulisan sa lungsud sa Badian nga posibleng napantok sa bato diha sa ilawom ang ulo sa biktima human moambak sa ikaduhang falls.
Dugang nakuhang impormasyon sa kapulisan nga hubog na kining daan sa wala pa maligo.
(Guam Logroño ug Darrel Carumba) (BANAT NEWS)