Multa sa delivery trucks patas-an

CEBU, Philippines - Gisugyot sa Cebu City Integrated Traffic Operations and Management (Citom) nga patas-an na ang multa sa mga delivery truck sa siyudad nga walay delivery permit.

Ang Omnibus Tax Code sa dakbayan magpahamtang lang og P300 ngadto sa P500 nga multa alang niadtong mga delivery truck nga mapakyas paglukat niini.

Apan matud ni Citom executive director Arnel Tancinco nga sa proposal nga ilang iduso ngadto sa konseho sa siyudad kini himuon na unyang P2,500.

Kini tungod sa pagtoo sa Citom nga gigamyan ra sa kasamtangang multa ang mga delivery truck hinungdan nga magdumili paglukat sa nahisgutang permit.

Nagkanayon si Tancinco nga sagad makalapas sa maong ordinansa mao kadtong delivery truck sa mga dry goods ug ubang merchandise.

Nidugang si Tancinco nga sa ilang proposed measure ipaklaro usab nga bisan kung dunay delivery permit apan dili dalhon, mahimo gihapong pamultahon.

“Amo gyod nang ipaklaro kay duna man goy uban nga gibilin ilang delivery permit, pero sa among proposal pamultahon gihapon ang dili magdala og permit,” sumala ni Tancinco.

Gipaabot ni Tancinco nga ang mga konsehal nga sakop usab sa Citom board sama nilang konsehal Sylvan Jakosalem og Yayoy Alcoseba maoy mopalabang sa ilang proposal.

Nagtuo hinuon si Tancinco nga mapaubsan pa ang gisugyot nga multa sa Citom atol sa deliberasyon sa ipalabang unya nga ordinansahon sa City Council.

Dunay itakda usab nga public hearing sa ipasar nga proposed measure alang sa apektadong tag-iya sa mga delivery truck sa siyudad.

Ang ordinansahon alang sa pagpahamtang ug mas taas nga multa sa mga delivery truck posibleng mapalabang sa sunod nga sesyon sa City Council.

Nagkanayon si Tancinco nga ang delivery permits mahimong lukaton sa City Treasurer’s Office o dili ba hinuon sa buhatan mismo sa Citom. - BANAT NEWS