Taga Carmen Village nalubong sa lapok

CEBU, Philippines - Ang mga molupyo sa Carmen Village, sa barangay Poblacion, dakbayan sa Talisay nagpunay na og bagutbot gumikan sa kalagot nga hangtod karon wala gyud humana sa kagamhanan sa dakbayan ang pag-aspalto sa ilang karsada nga matud pa sa panahon sa ting-uwan tagaliog ang lapok.

Usa sa mga molupyo kinsa wala magpaila mibutyag sa Banat News nga ang 1st, 2nd ug ang katunga sa 3rd street mao pa lay na-aspalto ug wala na ipadayon ngadto sa katunga sa 3rd street paingon ngadto sa 6th street.

Ang maong molupyo kinsa nagpangagot ang bag-ang sa kasuko nagkanayon nga nagkagrabi ang ilang kahimtang karon kay inigbundak sa uwan malubong sila sa lapok.

Ilang gipanghinaot nga ipadayon na unta sa siyudad ang pag-aspalto sa ilang lugar aron nga dili sila magkamuritseng sa lapok.

Si Talisay City Engineer Audie Bacasmas sa pakighinabi sa Banat News kagahapon nagkanayon nga iya sa kagamhanan sa dakbayan kining proyektoha sa pag-aspalto sa karsada diha sa Carmen Village apan wala sila’y nadawat nga taho gikan sa kontraktor nganong gihunong niini ang ilang trabaho.

Si Bacasmas mipasabot nga nag-agad kini sa buhatan sa mayor kung asa dapita ang ipauna og trabaho ug ang ilang buhatan igo lang nga mopatuman sa mando.

Apan bahin sa paghunong sa trabaho, misaad si Bacasmas nga iya pa   kining susihon aron hisayran ang hinungdan kun unsay gibasehan sa kontraktor sa paghunong sa ilang trabaho.

Pipila nga mga hinungdan niini mao ang dili maayong kahimtang sa panahon ilabi na kun magpunay og uwan o kaha kuwang kini og manpower o materyales .

Apan mipasidaan si Bacasmas nga kung walay igong rason ang maong paghunong sa trabaho siguradong makabayad ang maong kontraktor og multa ngadto sa siyudad . - Brenda D. Batuto (BANAT NEWS)