Kabukiran may midwife na

CEBU, Philippines - Ang kakuwang og midwife sa gobiyerno nga nakapabalaka sa mga molupyo sa bukirang barangay sa dakbayan sa Talisay kay walay makaatiman sa mga inahang manganak , nasulbad na karon human kaaprobahi ang balaod bahin sa ‘health facility based delivery”.

Si Kapitan Saturnino Navecilla sa barangay Campo 4, sa maong dakbayan mibutyag sa Banat News nga murag nahuwasan siya karon kay nagtuo siya nga may madestino na nga permaninteng midwife sa iyang barangay karong may balaod na ang kagamhanan sa dakbayan kalabot niini.

Pait kaayo ang kahimtang sa taga Campo 4 , matud pa ni Navecilla kay may health center sila apan walay doktor ug midwife nga nadestino.

May midwife sa gobiyeno sa dakbayan apan kausa ra sa usa ka buwan kini moduaw sa Campo 4 gumikan sa kabakilid sa ilang agianan.

Maoy hinungdan nga kutob sa talianakay nga inahan, adto nila dad-a sa silingang barangay nga mao ang Jaclupan kay aduna may permaninteng midwife nga nadestino sa maong barangay.

Apan dihang giaprobahan sa konseho ang resolusyon ni konsehal Shirley Belleza nga nagbaod nga dili na makapanabang sa manganakay nga inahan ang usa ka midwife kung ang maong manganakay dili molupyo sa lugar nga gidestinohan sa maong midwife, naglumpayat sa kalipay ang taga Campo 4, tungod sa pagtuo nila nga kadestinohan na gyud sila og kaugalingong midwife.

Matud pa ni Navecilla nga dili na siya mabalaka karon kay may makaatiman na sa mga inahang talianak sa iyang lugar ilabi na nga gumikan sa kabugnaw didto puyra buyag puwerting kusoga sa produksyon sa bata. - Brenda D. Batuto (BANAT NEWS)