Asawa gidunggab sa bana

CEBU, Philippines - Giunay og dunggab sa iyang bana ang kaugalingong asawa sa walay igong hinungdan sulod sa ilang pinuy-anan sa sitio SanSan barangay Maño lungsod sa San Remegio niadtong Huwebes sa alas 4:00 sa hapon.

Ang biktima mao si Lorisa Abong Isidto, 38, samtang ang suspek mao ra usab ang iyang banang si Jesus Isidto, 43, pulos nagpuyo sa nahisgutang lugar.

Matud pa ni PO3 Joe Johnnesky Ynot sa San Remegio Police dihang nahinabi sa Banat News , ang biktima ug suspek diha sulod sa ilang panimalay uban sa ilang mga anak ug sa walay igong hinungdan kalit kining nanunggab sa iyang asawa gamit ang kutsilyo.

Ang biktima wala makabantay maayong pagkaigo sa kilid nga bahin sa tuong lawas ug giusban og dunggab ang tiyan ug nalup-og ug daling gitabang sa mga anak dayon gidala sa Severo Verallo District Hospital sa Bogo.

Samtang ang suspek nadakpan usab dayon sa mga polis human daling nakapangayo og tabang sa kapulisan ang mga silingan ug nagtingkagol na karun sa detention cell.

Matud pa niYnot sa ilang pakisusi nga dunay sakit nga nervous breakdown ang suspek ug maoy gituohang hinungdan sa pagpanunggab sa kaugalingon niining asawa.

Hinuon kagahapong adlawa nibisita sa police station ang 16-anyos nga anak sa biktima ug suspek ug naghatod og pagkaon sa nabalhug niyang amahan ug mipadayag kini sa mga polis sa pagpasaylo ug dili nalang paghinayon og kiha sa ilang amahan. - Darrel Carumba (BANAT NEWS)