CEBU, Philippines - Nakit-an nalang patay human gituohang maghikog ang usa ka mag-uumang gikatahong nag-selos sa iyang asawa diha sa barangay Esperanza lungsod sa Aloguinsan niadtong Huwebes sa alas 5:00 sa sayong buntag.
Ang nakit-an nalang nagbitay ug wala nay kinabuhi mao si Teofilo Sabala, 55, nagpuyo sa nahisgutang lugar.
Matud pa ni PO3 Alex Nable sa Aloguinsan Police dihang nahinabi sa Banat News ang asawa niining si Abelina Sabala maoy nakadiskubre kaniya nianang pagkabuntag nga nagbitay na ug dunay higot nga pisi sa liog sulod sa ilang payag sa ilang mga kanding.
Dali unta nilang gitabang uban sa mga anak si Sabala apan gahi na kini ug gituohan sa kapolisan nga gabii pa kini nagpakamatay.
Ang municipal health officer sa lungsod maoy miproklamar nga patay na kini ug paghikog gyud ang hinungdan sa kamatayon. Subay sa gihimong pagsukit sukit sa kapulisan sa asawa niini gitug-an niining grabe kaayong magselos ug pagkaluoran sa iyang bana.
Nasayran sab nga ikatulo na kining higayun nga nagpakamatay si Sabala apan makadaghan usab kining mabantayan nga magpakamatay apan niadtong miaging gabii wala na kini mabantayi pa ug nilampos gyud sa tinguhang magpakamatay. – BANAT NEWS