'Fixer' sa LTO gibirahan sa Talisay patay

CEBU, Philippines - Patay diha-diha ang usa ka giingong ex-convict ug fixer sa Land Transportation Office (LTO) sa dakbayan sa Talisay human kini pusila kagahapon sa buntag sa duha ka wala mailhing lalaking nagsakay og motorsiklo diha sa barangay Dumlog.

Ang biktima giila sa mga polis nga si Jojines “Joe” Cauba, 47, residente sa sitio San Jose, barangay Dumlog sa nahisgutang siyudad nakaangkon og samad pinusilan sa ulo nga gituohang hinungdan sa iyang kamatayon.

Na-recover nila ni Sr. Insp. Noli Cernio ug PO2 Lino Diez sa Talisay City Police Station gikan kang Cauba ang mga dokumento sa mga rehistro sa LTO ug insurance.

Base sa pasiunang imbestigasyon ni Diez nga ang biktima ang paingon unta ngadto sa barangay Poblacion ug pag-abot diha sa lugar nga nahitaboan kalit lang mitungha ang nahisgutang duha ka lalaking nagsakay og motorsiklo ug sa walay igong rason gipusil ang biktima.

Gikatahong daghan nang mga tawong mireklamo batok ni Cauba nga midangop pa gani sa kapolisan tungod kay giingong gamiton sa biktima sa personal niini ang kwarta nga alang unta rehistro sa sakyanan sa mga kliyente nga misugo kaniya.

Si Sr. Insp. Isagani Abalo, deputy sa TCPS nagkanayon nga nakadawat sila og report nga miyembro kaniadto si Cauba sa Dolphin Gang, usa ka grupo sa mga notorious nga mga tulisan sa Sugbo.

Si Cauba ang nakaengkwentro pa kaniadto sa mga polis sa Talisay ug nadakpan ug gibalhog sa Bilibid Prison sa Muntinlupa apan dihang nakagawas na kini pipila ka tuig na ang milabay wala na mokuyog sa kanhi niya mga ka grupo ug ang panginabuhian niini karon mao ang pagka-fixer.

Usa sa mga anggulo nga gilantaw karon sa mga polis sa motibo sa hitabo mao ang kabahin sa trabaho ni Cauba. - BANAT NEWS