'Mastermind' sa tulis gitipi

CEBU, Philippines - Patay na ang gipasanginlang lider sa grupo sa mga tulisang nangigo dinhi sa dakbayan sa Sugbu nga si Jose Roy Quimada human gibanhigan niadtong Miyerkules sa alas 6:45 sa gabii sa Bonifacio Extension sa barangay Aguada, Ozamis City.

Si Quimada nag-atubang og kasong robbery with homicide sa korte dinhi sa Sugbu human maoy gitumbok nga maoy utok sa mga tulis dinhi sa dakbayan sa Sugbu human mitug-an ang iyang mga kaubanan nga sila maoy mitulis sa Oro Sugbu diha sa may Magallanes; GP Dental Supply; LBC Talamban; Fooda Savers Mart; Golden Treasures and Jewelry ug ubang mga money changers dinhi sa Sugbu.

Ang director sa kapulisan sa dakbayan sa Sugbu Sr. Supt. Patrocinio Comendador, nagdudang konektado ang pagpatay kang Quimada sa pagpatay kang Jeromy Polistico kinsa gipatay gawas sa Cebu City jail niadtong milabay’ng semana human maka-piyansa.

Si Polistico giingong sakop sa grupo ni Quimada bisan paman sa pagpanghimakak ni Polistico sanglit nakapaduda sa kapolisan nga ang abogado sa duha usa ra.

Matud pa ni Comendador posibleng dunay internal nga panagbangi ug nagbinasolay na ang isi’g ka miyembro sa nahitabong sunod-sunod nga pagkasikop sa ilang mga sakop niadtong milabay’ng bulan.

Si Polistico usa sa grupong mitulis sa alaherang si Jennifer De la Cerna nga nakuhaan sa P7.2 milyones nga mga diyamanteng alahas apan gidemalas ang grupo kay sila nangadakpan sa kapulisan sa barangay Punta Princesa ning dakbayan sa Sugbu.

Sa habig sa kapulisan nalipay si Comendador, tungod kay na-neutralized ang dagkong lider sa mga tulisan nga sila si Roy Quimada ug Roy Fernandez, apan ang labaw’ng nalipay kadtong ilahang mga dagkong target nga tulison ug ang mga nabiktima.

Dunay migawas nga di kumpirmadong report nga gikan sa Ozamis nga gidudahang ang mga kaubanan ni Polistico nga usa ka Sugbuanon maoy mituyo og adto didto ug gibawsan si Quimada.

Si Comendador nagkanayon nga posibleng nasuko ang mga kauban ni Quimada nga sila gibiyaan na niini, nagtuo usab si Comendador nga sa pagkamatay ni Quimada maglisod dayon pagpabarog og balik sa grupo ang mga nahibiling miyembro.

Si Sr. Insp. Michael Anthony Bastes, hepe sa Theft and Robbery Section sa TRS sa Cebu City Police Office (CCPO) mibutyag sa mga sakop sa mga tigbalita nga natusak-tusak sa mga bala ang kalawasan ni Quimada nga taga barangay Kawit, Pagadian City.

Gikatahong tulo ka wala mailhing suspetsado ang nibanhig niini samtang nagsakay sa iyang CRV paingon mo-eskwela sa Misamis University diin kini magtungha pagka third year sa College of Law.

Si Bastes nagkanayon nga usa ka kauban niyang polis sa maong dakbayan maoy mikumpirmar nga si Quimada gyud ang gipatay ginamit ang M16 Armalite, .45 kalibre ug gituohang shotgun.

Gipadayag niini nga ang pagpatay mahulagway nga grabe gyud ang kalagot ug kasuko sa mga mamumuno ngadto kang Quimada.

Samtang giklaro niini nga siya mismo nalipay ning maong kalambuan nga gawas nga na-neutralized ang grupo ma-dismissed usab ang kasong gipasaka ni Quimada nga P1.3 milyon damages kaniya.

Sama kang Comendador, nagtoo usab si Bastes nga dako ang posibilidad nga kauban sa grupo ni Quimada ang miunay kaniya.

Gitug-an ni Bastes nga dihang nadakpan nila si Polistico, Kirby Abnilla ug Noel Davis, ilang nakuha sa cellphone ni Polistico nga nag-text kini ngadto kang Quimada sa mga kaligutgot niini.

Si Bastes mibutyag nga ang maong text messages ni Polistico nagkanayon nga “Bay kumusta na! Biyaan raman nimo imong mga bata may adlaw raka.”

Si Quimada nadakpan na kaniadto human nila tulisa ang ASPAC Bank sa lungsod sa Bogo niadtong 2005. - BANAT NEWS