BIN nga nagdala og armas sikop

CEBU, Philippines - Arestado ang usa ka miyembro sa barangay intelligence network nga nadestino sa Cebu City Hall human kini nasakping nagsukbit og armas nga walay papeles paghupot niini kagahapon sa buntag sulod sa Smile Again Restaurant sa Salinas Drive sa barangay Lahug.

Ang gidakop sa mga sakop sa Mobile Patrol Group mao si John Lim, molupyo sa sitio Bato barangay Ermita human kini gisumbong sa usa ka trabahante sa nahisgutang restaurant nga si Mila Amario.

Nasayran nga si Lim nakit-an ni Amario nga nagluklok sa maong armas sa iyang hawak maong gipahibalo niya ang kapolisan.

Sila si PO3 Ricardo Hisoler ug PO2 Maurice Caldoser mianha sa maong kan-anan ug nakuha gikan sa posesyon ni Lim ang kalibre .357 paltik nga rebolber nga may tulo ka buhing bala sa kalibre .38 ug holster.

Ang maong BIN kasamtangan karong gitanggong tungod sa nahimong kalapasan niini. - Lesley Caminade (BANAT NEWS)