2 batan-on gipamusil

CEBU, Philippines - Duha ka batan-on ang nangaangol sa managlahing pagpamusil sa laing grupo sa mga batan-on sa Lapulapu ug sa Compostela sa milabay’ng gabii.Diha sa Compostela, usa ka 17-anyos nga taga sitio Seaside barangay Poblacion ug ang upat ka mga suspek tulo niini nadakpan sa kapulisan ug duha kanila 17-anyos usab (mga pangalan gipugngan) ug ang usa Rey Galamiton Jr, 19-anyos pulos molupyo sa sitio Laray barangay Canamukan samtang ang nakaeskapo ug pabilin pang nagtagotago mao si Eliseo Pasaje, taga sitio Bogo barangay Cogon.

Matud pa ni SPO2 Pedro Enriquez sa Compostela Police dihang nahinabi sa Banat News ang biktima niangkas kini sa biseklita nga gimaneho sa iyang amigo paingon sa simbahan ug pag-agi nila sa maong lugar kalit lang namusil ang mga suspek.

Maayong pagkaigo sa walang bahin sa abaga sa biktima ug miambak kini sa biseklita dayung dagan pahilayo ug giusban pa unta og pusil ug maayo nalang wala na maigo.

Ang mga suspek kagahapon sa buntag na madakpi human mailhi sa biktima si Galamiton.

Laing 17-anyos usab ang gipusil diha sa sitio Carajay barangay Gun-ob dakbayan sa Lapulapu kagahapon sa kaadlawon.

 Ang biktimang 17-anyos nga residente sa Purok Lemonsito, sa Gun-ob dakbayan sa Lapulapu nakaangkon og samad pinusilan diha sa iyang walang tiil nga milapos sa lapalapa.

 Sa imbestigasyon ni SPO1 Jack Inihaw sa Crime Against Persons nasutang naglakaw si Ompad sa maong dapit kalit miduol ang usa ka wala mailhing batan-on dayong bunot sa wala pa matinong kalibre sa armas ug gipusil ang kiting sa biktima.

 Ang namusil daling misakay og taxi pahilayo sa maong dapit ug sa pagresponde sa kapolisan pakyas kini sa pagsikop sa suspetsado.

Sama sa nahitabo sa Lapulapu, nagduda usab ang kapolisan sa Compostela nga posibleng may kalambigitan sa gang o sa fraternity ang hitabo. -  BANAT NEWS