7 ka mananagat sikop sa Cordova

CEBU, Philippines - Nasikop ang pito ka mananagat sa dihang naaktuhan kini nga mihimo og ilegal nga pagpanagat didto sa barangay Catarman lungsod sa Cordova sa milabay’ng gabii.

 Ang mga nasikop mao sila ni Dennis Coronado, 33, Guillermo Sungahid, 33, Juvy Ulila, 29, Nestor Avergonzado, 25, Cesar Esmiago, 49, Reynaldo Pangadlin, 37, ug Maximiano Jimenez, 43, pulos mga residente sa Jubay, Liloan.

 Base sa impormasyon gikan ni SPO1 Laurencio Wagwag, desk officer sa Cordova Police Station nasayran nga samtang nagpatrolya ang mga sakop sa kapolisan uban sa mga sakop sa Cordova Marine Watch (CMW) nga nagpahigayon og illegal nga panagat sa maong dapit ang mga dinakpan gamit ang usa ka "pamo" , usa ka baldeng isda ug pukot nga gagmay og lungag hinungdan sa pagsikop niini.

 Lakip sa gikonpiskar sa mga sakop sa CMW ug kapolisan sa Cordova uban ni PO1 Michael Limpangog mao ang usa ka pumpboat .

 Gumikan niini ang mga mananagat mapasakaan kini og kasong kalapasan sa Akta Republika 8550,samtang nagpadayon ang ilang pagkabilanggo sa kapolisan sa lungsod sa Cordova. - Bong Soriano (BANAT NEWS)