CEBU, Philippines - Gitigbas gamit ang sanggot ang ulo sa usa ka lalaki nga giingong mamalit og sigarilyo apan gahi mobayad sa usa ka tindahan sa barangay Bolinawan siyudad sa Carcar niadtong Martes sa alas 5:20 sa hapon.
Ang biktima nga nakaangkon og samad tinigbasan sa tuong bahin sa ulo ug abaga mao si Aurelio Emnace, 49, minyo ug molupyo sa nahisgutang lugar samtang ang nanigbas mao si Alejandro Masanegra, 66, minyo ug nanag-iya og usa ka sari sari store sa maong lugar.
Matud ni SPO1 Joel Panaganan sa Carcar Police Station sa dihang nahinabi sa Banat News ang biktima mipalit og sigarilyo bali og siyete pesos ug human madawat niini ang sigarilyo nagkuot-kuot kini sa iyang bulsa ug wala gyu'y kwarta nga ikabayad.
Apan sa dihang gipaninglan ni Masanegra sa bayad mipauli kini aron sa pagkuha og kwarta ug sa pagbalik masuk-anon kining mihatag sa bayad apan wala na kini dawata pa ug gisultihan nga iya na lang ang sigarilyo ug dili na pabayran.
Tungod niini, nasuko ang biktima nga nakainom usab niadtong higayona ug buot kining mosulod apan gipasidan-an ni Masanegra nga dili mopadayon kay basin ug iyang matigbasan apan namugos gyud pagsulod pinaagi sa pag-abli sa pultahan hinungdan nga gitigbas kini gamit ang sanggot ug maayong pagkaigo sa tuong bahin sa ulo ug mitapsing ang sanggot ug didto motabas sa iyang tuong bahin sa abaga.
Ang biktima gitabangan sa mga estambay ug gihatod dayon sa Carcar District Hospital apan tungod sa dakong samad niining naangkon gilahos kini sa Vicente Sotto Memorial Medical Center (VSMMC) alang sa dugang medikasyon.
Samtang ang suspek nadakpan usab dayon sa mirespondi nga mga polis ug nagtingkagol na karun sa detention cell. – BANAT NEWS