Tanod ug estudyante gipusil gibunalan

CEBU, Philippines - Bala ug bunal maoy miangol sa usa ka barangay tanod ug sa usa ka estudyante human sila pusila ug bunali didto sa dalan Don Pedro Cui, barangay San Antonio, ning dakbayan sa Sugbo kagahapon sa ala 1:00 sa kaadlawon.

Ang tanod nga gitaroyan sa bala sa buko-buko mao si Samson Suntones, 37, tanod sa San Santonio , samtang ang estudyanteng gipusposan og dos for pos mao si Verna Paras Estor, hingkod, estudyante sa University of the Visayas.

Sumala ni SPO1 Jay Yballe, sa Cebu City Police Office (CPPO) nga samtang natulog sa iyang lawak si Estor, kalit lang kining gipusposan og dos por dos sa wala hiilhing tawo nga nakasaka sa balay nga iyang giabangan.

Gumikan sa kasakit ug kakurat misinggit ang biktima ug nangayo og panabang sa iyang mga silingan hinungdan nga mikaratil og dagan ang kriminal.

Unya ang maong kriminal midiretso ngadto sa barangay hall sa San Antonio ug didto gipataroyan sa bala sa iyang armas ang bukobuko ni Suntones.

Samtang gihatod sa Cebu City Medical Center ang mga angol, nakasibat usab dayon ang kriminal nga maoy gipangita karon sa kapolisan. - Lesley Caminade (BANAT NEWS)