City Hall gipasidunggan sa DepEd

CEBU, Philippines - Gipasidunggan sa Department of Education (DepEd) ang kagamhanan sa dakbayan sa Sugbu tungod sa maayong pagpatuman niini sa Alternative Learning System (ALS) program.

Ang chairman sa Committee on Education sa City Council nga si Konsehal Gerardo Carillo maoy midawat sa award didto sa Baguio City kagahapong adlawa.

Sa samang higayon gipaambit usab sa konsehal atol sa awarding ang mga paagi kung giunsa pagpatuman sa City government ang nahisgutang programa.

Matud ni Carillo nga ilang gisugdan pag-implimintar ang ALS niadtong tuig 2007 sa napulo ka barangay apan karon kini gipatuman na ngadto sa 80 ka mga barangay sa dakbayan.

Gani miingon ang konsehal nga sa kasamtangan, ang ALS program ila na usab nga gitanyag ngadto sa mga senior citizen, mga kawani sa City Hall ug sa mga barangay official.

Ang ALS maoy programa sa DepEd alang sa mga out-of-school youth nga wala makatiwas og tungha sa elementarya ug high school.

Wala na kinahanglana sa maong programa nga moadto pa sa tunghaan ang estudyante niini aron maminaw sa leksyon sa mga magtutudlo kay hatagan man sila og mga module nga maoy tun-an niini aron may ikatubag sa panahong suwayan na sila pinaagi sa ALS Accreditation and Equivalency Test sa DepEd.

Nagkanayon si Carillo nga ang ilang tumong niini nga makabaton usab og diploma sa elementarya ug high school ang tanang mulopyo sa siyudad.

Nasayran gikan sa konsehal nga may kapin na sa singko mil ka mga mulopyo sa dakbayan nga nakabaton og diploma sa elementarya ug high school pinaagi sa ALS program.

Kini gipaabot nga madugangan pa tungod kay may laing ALS Accreditation and Equivalency Test nga gitakda na usab nga ipahigayon karong buwan sa Oktobre. - Elly Bolonos (BANAT NEWS)