Kapitan Abella abswelto sa kaso

CEBU, Philippines - Gibasura sa Ombudsman Visayas ang kasong gipasaka sa kanhi tresurera batok sa market collector ug kapitan sa barangay Labangon human gihulagway nga walay igong basihanan ang maong kiha .

Si Kapitan Felix Abella sa Labangon ingon man ang market collector niini nga si Christine Abella gipasakaan og kaso sa kanhi tresurera sa barangay nga si Elena Copino didto sa Ombudsman Visayas sa pasangil nga dili kuno maayo ang sistema sa pangolekta sa mga abang sa mga stall sa merkado sa barangay.

Apan human makapadangat og tubag si Kapitan Abella sa maong kiha uban sa pagpasabot bahin sa ilang pamaagi sa pagpangolekta sa mga abang sa stall sa merkado adlaw adlaw , nakombinsir ang Ombudsman uban sa konklusyon niini nga walay balaod nga nalapas ang mga respondente busa gibasura ang maong reklamo

Si Graft Investigator officer-1 Rosanna Ortiz maoy mirekomendar sa pagbasura sa maong kiha nga gi-aprobahan usab nila ni Assistant Ombudsman Visayas Virginia Palanca Santiago ug Deputy Ombudsman for the Visayas Pelagio Apostol.

Samtang gibutyag ni Kapitan Abella sa Banat News nga daan na siyang nakahibawo nga mabasura ang maong kaso gumikan kay wala man siya’y kalapasan sa gipatumang sistema sa pangolekta sa mga abang diha sa merkado.

Gidugang sa kapitan nga nagtuo siya nga gituyo lang ang pagpasaka sa maong reklamo nga gisakyan usab sa pipila ka mga konsehal niya nga sakop sa oposisyon aron siya masuspenso ug makalingkod isip acting barangay captain ang numero-unong konsehal nga si Victor Buendia.

Gisuwayan unta pagkontak ning tigbalita ang mga staff sa barangay Labangon ug gipangayo-an og cell number ni Konsehal Buendia aron makuhaan sa iyang habig apan wala sila makahatag. - BANAT NEWS