Tomas andam pagsunod sa korte, apan...

CEBU, Philippines - Andam mosunod si Mayor Tomas Osmeña sa bisan unsang kamandoan unya sa korte kabahin sa gipasakang kaso kaniya sa pundok sa mga motorista nga mireklamo sa gihulagway nilang pag-abuso sa duha ka mga towing companies dinhi sa dakbayan ug mihangyo sa korte nga kini pahunungon na sa ilang operasyon.

Si Osmeña sa press conference kagahapon mibutyag nga kun duna may ipagawas nga temporary restraining order ang korte iyaha kining sundon hangtud nga di maresolbar ang kaso.

Napulo ka mga motorista ug ang usa sa labaw’ng kritiko sa mayor nga si Tinago Kagawad Joel Garganera buot usab nga mabayran sa danyos sa pagguyod sa One Stop Towing Services ug Road Warriors Towing Services sa ilang mga sakyanan.

Lakip sa gipasakaan og reklamo mao sila si Mayor Osmeña, Bise Mayor Michael Rama, mga sakop sa Konseho ug ang mga tag-iya sa duha ka towing companies.

Gikwestyon nang daan ni Garganera kaniadto pa ang pagkuha sa dakbayan sa serbisyo sa maong mga pribadong towing companies tungod kay wala kini mag-agi sa public bidding nga mao unta’y hustong proseso subay sa balaod.

Apan ang mayor mitubag na niini kaniadto nga maong wala na kini moagi sa maong proseso kini gumikan kay wala may gastos ang dakbayan niini ug gani mokita pa og 25 porsiyento gikan sa mga multa ang siyudad isip share.

Ang maong mga towing companies maoy manakop niadtong mga sakyanang gipataka og parking ilabi na sa mga dagkong kadalanan sa dakbayan, butang nga sumala pa sa mayor maoy nakaingon sa pagdasok sa mga sakyanan ug nagbunga og grabeng traffic.

Mipasidaan ang mayor nga kun mahitabong hunungon ang towing services mobalik sa kaniadtong problema ang kadalanan ug usa sa napanglantawan niyang maapektuhan mao ang mga kabumberuhan, emergency vehicles ug ang mga motorista.

Mipalabtik usab ang mayor nga mas maayo pang hasta ang City Traffic Office Management wagtangon kay makamenus pa og minilyon ka pesos ang dakbayan sa gastos ug mga polis nalang maoy pabantayon sa trapiko.

Ang dakbayan duna ray kapin 1,000 ka polis ug gipanglantawan sa mayor nga 200 ka polis maoy gikinahanglan nga pabantayon sa dalan aron pagpahapsay sa trapiko, kun kini mahinayon napanglantawang hasta ang trabaho sa polis batok kriminalidad maapektahan usab. - Edwin Ian Melecio ug report gikan sa The Freeman (BANAT NEWS)