P2 milyones luhong kotse gisakmit sa Customs

CEBU, Philippines - Gikonpiskar sa Bureau of Customs ang duha ka mga luhong sakyanan balor og P2 milyones nga buot ipalusot dinhi sa Sugbu gikan sa nasud sa Italya.

 Matud pa ni Capt. Jerry Arizabal ang Enforcement and Security Service Customs Police District Commander sa BOC Port of Cebu miabot ang maong kargamento nga usa ka 40-footer container van sa Cebu International Port gikan sa Italy niadtong Hulyo 26, 2009 luwan sa barkong M/V Channa Bhum.

Sumala pa sa BOC officials ang deklarasyon sa dokumento niini mga gamit sa panimalay ug   personal nga mga kagamitan nga gipanag-iya ni Christopher Lee nga adunay address nga Bunga, Cabucayan, Biliran City ug ang broker mao ang J&D Customs Brokerage.

 Gumikan niini si Capt. Arizabal mimando ni Special Agent Robert Terence Monteño sa paghimo og 100% nga eksaminasyon sa maong kargamento ug nadiskubrehang dili lang mga gamit sa panimalay ang sulod sa maong van kundili lakip usab niini ang duha ka mga luhong sakyanan.

 Usa ka Renault Kangoo 16-valve 2006 model ug Opel Corsa 2008 model nga gibanabanang mikabat ngadto sa 2 milyones ka pesos ang gisagol sa maong mga gamit sa panimalay.

 Matud pa ni Arizabal nga ang maong kargamento nakalapas sa EO 156 ug Central Bank Circular 1389 subay sa DTI-BIS rules and regulations tungod kay gidili kini sa balaod ang pag-import og sakyanan. – BANAT NEWS