CEBU, Philippines - Gipangrelibuhan sa hepe sa Talisay City Police Station ug gilabay ngadto sa Cebu Provincial Police Office (CPPO) ang tulo ka mga polis nga gipasanginlang mikilkil sa uyoan sa usa ka drug suspect nga ilang dinakpan.
Si Supt. Henry Biñas, hepe nila ni PO3 Eric Enad, PO2 Roy Sarsaba ug PO2 Keyserling Martin Gorosin III mipaubos sa tulo sa camp restriction ug kagahapon gilabay na gyud sila ngadto sa CPPO.
Ang tulo gisuwayan unta og entrap sa mga sakop sa National Bureau of Investigation tungod sa reklamo ni Elvincito Baguio nga gipangayoan siya sa tulo og P100,000 nga mikunhod ngadto nalang sa P50 mil dihang iyang gihangyo.
Ang tulo maoy gikatahong nakadakop sa pag-umangkon ni Baguio nga si Maridel Obrero diha sa Tanke, Talisay atol sa saturation drive niadtong adlaw'ng Biyernes.
Apan gikatahong giduol si Baguio ni Sarsaba nga ilang paubsan ang kaso batok kang Obrero gikan sa pushing ngadto na sa possession of illegal drugs basta mohatag sila og P100 mil.
Ang NBI nagpatabang nalang kang Biñas pinaagi sa paghatag kanila sa personal profiles sa tulo ug positibong giila ni Baguio pinaagi sa ilang mga litrato.
Gikatahong gigamit sa tulo ang pangalan ni Biñas sa maong pagpangilkil apan matud pa ni Biñas nga bukas siya alang sa imbestigasyon kabahin sa maong alegasyon.
Si Biñas nagkanayon nga ang mga patrolcars sa Talisay police station dunay kaugalingong civilian drivers apan nianang tungura gikatahong si Gorosin maoy mi-drive sa nahisgutang patrolcar.
Si CPPO director, Sr.Supt. Jesus Gaquing mibutyag nga dili na siya mohimo og imbestigasyon kabahin sa maong kaso tungod kay ang NBI mipadayag nang sila maoy mohikay niini diha sa Ombudsman ug sa National Police Commission.
Samtang giawhag ni Police Regional Office-7 director Chief Supt. Lani-O Nerez ang ginsakupan nga padayunon ang operasyon batok sa illegal drugs bisan paman sa hitabo.
Gibutyag usab niining walay mapaabot nga legal assistance ang tulo gikan sa PRO-7 tungod kay kadto rang legitimate operations nga moresulta sa pagpasaka'g kaso batok sa mga polis ang ilang tabangan. – BANAT NEWS