CEBU, Philippines - Gipaabot sa konseho sa dakbayan sa Mandaue nga ikasumiter ngadto kanila ang plano sa tukorong eco park diha sa open dump site sa barangay Umapad nga nagkinahanglan og gahin nga P33 milyones.
Si Bise Mayor Carlo Fortuna nga nahinabi sa Banat News miingon nga buot lamang nilang makita ang maong plano.
Matud pa ni Fortuna nga importante kaayo nga masud-ong nila ang blueprint sa dili pa nila aprobahan tungod sa kadako sa budget niini.
Dugang pa ni Fortuna nga sa sayo pa gipasiatab sa mayor nga hingpit na niyang gipatak-opan ang maong basurahan sa Umapad apan naunsa ba nga wala man diay kay hangtod karon padayon man ang pagkalabayanan niini sa basura.
Si Fortuna kauban ang mga opisyal sa Department of Environment and Natural Resources (DENR) 7 personal gyud nga miduaw didto sa maong basurahan sa miaging adlaw ug nasaksihan nila ang mga trak sa basura nga naglinya didto nga miyabo sa mga kargang basura sukwahi sa gipagarpar ni Mayor Cortes nga gisirhan na kini.
Hinuon giangkon sa mayor sa Banat News nga tinuod nga basurahan lang gihapon ang maong lugar apan kadto nalang malata maoy ilabay didto, samtang ang dili malata nasapian na sa mga basurero sa maong lugar.
Mahinumdoman nga sa miaging buwan gipasaksihan gyud ni Cortes ang seremonya sa pagtak-op kunohay sa maong basurahan sa mga environmental lawyer nga sila si manlalaban Gloria Ramos Estenzo ug Benjamin Cabredo. Apan matud pa ni Fortuna nga maayo pa og wala ipasiatab ni Cortes nga gipasirad-an na niya ang maong basurahan aron dili siya nganlan og bakakon sa katawhan. - Romeo T. Limpangog (BANAT NEWS)