Ihawan sa Talisay pinakalami og karne

CEBU, Philippines - Ang ihawan sa dakbayan sa Talisay maoy napiling “best meat establishment” sa region-7 ug maghatag kanila og luna alang sa banggang nasudnon sa labing limpyo nga ihawan sa nasud, matud ni Talisay City Veterinarian Dr. Gelileo Larawan.

Si Larawan nagkanayon nga ang ihawan sa Talisay ubos sa “double A” standard ug gisertipikahan kini isip good manufacturing practice (GMP) nga may grado nga 83.43%.

Matud ni Larawan nga kining tanan nagpasabot nga ang mga karne ning maong ihawan sa Talisay limpyo ug kasaligan nga makaayo sa panglawas sa katawhan.

Niadtong milabay’ng semana ang representante sa Department of Interior and Local Government (DILG), Department of Environment and Natural Resources (DENR), National Meat Inspection Services (NMIS) ug Department of Health (DOH) nga gikan sa kaulohan maoy mipahigayon og evaluation sa slaughter house sa dakbayan alang sa nasudnong competition. Kini human mogawas niadtong Hulyo 8, 2009 ang resulta nga pasado ang ihawan sa Talisay alang sa nasudnong kompetisyon sa labing limpyo nga ihawan sa nasud. Si Larawan midugang nga tungod sa mga modernong kahimanan sa ihawan nahimo kining kwalipikado sa maong bangga. - Brenda D. Batuto (BANAT NEWS)