P1 usbaw sa pletihan gitinguha sa CITRASCO

CEBU, Philippines - Gisang-at na kagahapon sa hapon sa Cebu Integrated Transport Services Cooperative (CITRASCO) ang ilang petisyon alang sa pagpausbaw og P1 sa minimum nga pletihan sa mga jeepney dinhi sa Sugbo.

Si Benjamin Ryan Yu nga maoy chairman sa CITRASCO nga nahinabi sa Banat News misang-at sa maong petisyon sa buhatan sa Land Transportation Franchising and Regulatory Board (LTFRB) 7.

Matud pa niya nga ilang gitinguhang mopausbaw og P1 sa minimum nga pletihan tungod kay mao kini ang makiangayon nga pagahimuon nilang mga drayber ngadto sa mga pasahero.

Si Yu miingon nga sulod lamang sa duha ka semana nga nakalabay mokabat na sa P4.50 ang pagsaka sa presyo sa matag litro sa krudo ug bug-at na kaayo kini alang nilang mga drayber.

 “Sa P1 nga among gipangayong fare increase sa minimum fare, kun kaaprobahan kini sa LTFRB ang probational fare nga P6.50 mahimo na unyang P7.50,” matud pang Yu.

Gisalikway ni Yu ang nahaunang pamahayag ni LTFRB Chairman Alberto Suansing nga walay pagpausbaw sa minimum nga pletihan niining naghinapos nga mga bulan sa 2009.

Wala pay tubag ang LTFRB-7 kabahin niini ug ingon man ang petsa sa public hearing sa maong petisyon. - Romeo Limpangog (BANAT NEWS)