Lalaki gi-salvage

CEBU, Philippines - Pabiling wala pa mailhi sa kapulisan ang usa ka lalaking nakit-ang patay na daplin sa karsada nga dunay samad pinusilan sa lawas ug gituohang gi-salvage diha sa sitio Bacay barangay Tulay lungsod sa Minglanilla niadtong Lunes sa alas 5:00 sa kaadlawon.

Ang biktima gihulagway lang sa kapulisan nga hingkod ang panuigon ug gibana-banang may gitas-ong 5'4, sakto ang pamarog, blond ang buhok, naka-short ug naka-senina og kolor yellow nga dunay tatak unlimited design.

Matud ni PO1 Rodulfo Quilala sa Minglanilla Police dihang nahinabi sa Banat News ang biktima nakit-an sa mga habal-habal drayber sa daplin sa dalan.

Dihang gisusi duna kini samad pinusilan sa walang bahin sa lawas nga nilapos sa bukobuko gikan sa wala pa matinong kalibre sa armas nga maoy hinungdan sa kamatayon niini.

Gisuwayan pa unta pagdala sa Minglanilla District Hospital ang maong tawo apan patay na gyud.

Dugang nahipos nga impormasyon sa kapulisan nga ang maong lalaki gikatahong misaka og mga panimalay sa maong lugar ug dunay nakasakop hinungdan nga gigukod ug gipusil.

Hinoon ang kapulisan padayun pa sa ilang imbestigasyon pag-ila sa maong lalaki ingon man ang residenteng maoy nakapusil niini. - Darrel Carumba (BANAT NEWS)